GABAY:-Dalladda Ictisaam.

Daroniska diiradaha watee inna dul heehaaba

Iyo dayuuradaha kenyaatiga inna duqeynaaya

Dad iyo waxay naga dileen duunyo iyo xoolo

Dabaabadaha ay nala dhaceen maatadaan duugnay

Kama diirin dallad ictisaam may damqeyn weliye

Sidii dam jadiid oo kaleey nagu digaayeene

Dambigaba waxay saarayeen da,yartii kacaye

Wax daciifshay mooyee raggii dowga seegeene

Dastuurada qaar baa dejiya lagu duloobaahe

Qaar baa dillaalaya waxay nooga digayeene

Dib ufiirsha soomaaliyeey waa digniin qarane

 

Shimbiraha duuliyo dabeyl dayax ma owdaane

Daandaansi nacab kula dul yimid dood macelineyne

Da,yartaa dareentiyo raggaa diiddan ee leexday

Dalabku halka uu kagalay deriska weeyaane

Dad intii ogsoonow hadeyn daacad hadalkeeda

Dib ufiirsha soomaaliyeey waa digniin qarane

 

Inkastooy dadaaleen wax badan oon ku darajeeyo

Inkastooy dawaam badan galeen diinta bariddeeda

Inkastooy ducaad iyo akhyaar daad ah soo saartay

Inkastoon dariiqii samaa aan ku daba joognay

Inkastuu midaan duufsaneyn malaha deel qaafay

Iskastuu mid yara diidani docaha eegaayo

Ayagoo isku duuban bay daqarro geysteene

Ayagaan diktooneyn markay deg deg hadlaayaane

Daliilaha intii laga rabaa loo ildabayaaye

Nin dalkiisi iibshaan laheyn dux iyo iimaane

 

Dadku waa ka deyrsheen duruus daah lasaaraaye

Damaashaad adduunyana rag woow kala dambeeyeene

Dabaqyada islii iyo intuu doollar sii muuqdo

Oo dabinku hoos yaallo waa lagu dumaayaahe

Iga daa wixii loo dirsaday diidnay may orane

Nin dalkiisi iibshaan laheyn dux iyo iimaane

Dumar loo muxaarado raggoo hadal ladeeqsiiyo

Ayagaa uduulaayey oo dibad u dhoofaane

Dalalkii dil walaal xukumay bay kadegayaane

Docdoodaba lama eego waa loo diwaan geline

Waxa leysu kala doortay baan hadda ku daaheyne

Damiir laawe mooyee majiro shiikh ladoorshaaye

Dulli culumo baa kuugu daran waqti dagaaleede

Dalabaad shisheeyaa laharay ducaaddi qaarkeede

Nin dalkiisi iibshaan laheyn dux iyo iimaane

Dib ufiirso soomaaliyeey waan idiin digaye

 

W/T Xagaleey.